Planetimiz atmosfer və üzərində olan hər şeylə bərabər dayanmadan fırlanır. Ekvatordakı fırlanma sürəti saatda təxminən 1675 kilometrdir, yəni siz hal-hazırda saniyədə 465 metrə qədər olan bir sürətdə səyahət edirsiniz. Amma qütblərdən birinə yaxın olduğunuz halda, bu sürət bir qədər aşağı düşəcək.
Bəs biz bu hərəkəti niyə heç birimiz hiss etmirik? Cavab isə Dünyanın hərəkətinin strukturunda gizlənir. Gəlin daha da xırdalıqlara enək.
Sarsıntısız şəkildə sabit sürətdə hərəkət edən bir təyyarədə olduğunuzu düşünün. Təhlükəsizlik kəmərini açırsınız və təyyarənin dəhlizində gəzirsiniz. Bu halda təyyarənin hərəkətini hiss edə bilməzsiniz. Səbəbi sadədir – çünki siz də təyyarə və içindəki digər hər şey ilə birlikdə eyni sürətlə hərəkət edirsiniz. Buna görə də, təyyarənin hərəkət etdiyini dərk etmək üçün pəncərədən buludlara baxmağınız lazım olur.
Bu eynilə Dünyanın dönüşü üçün də keçərlidir. Planetimiz öz oxu ətrafında bir tam dövrəni 23 saat 56 dəqiqədə tamamlayır və demək olar ki, tamamilə sabit, fasiləsiz şəkildə fırlanır. Bu hərəkəti hiss etməyin bir üsulu üzünüzə toxunan küləyi hiss etməkdir, amma Dünya atmosferinin də bizimlə eyni sürətlə səyahət etdiyini unutmamaq lazımdır.
Əgər Dünya sürətini dəyişsəydi, biz bunu mütləq hiss edərdik. Çox xoş olmayacaq bu vəziyyət, planet miqyasında qəfil əyləcə basmaq kimi olardı. (buna qarşılıq olaraq, atmosfer saniyədə 465 metr sürətlə fırlanmağa davam edər və planetin səthini süpürərdi). Yəni, eynilə bir təyyarənin dəyişməz hərəkətini hiss etmədiyimiz kimi, nəhəng kosmos səfərimiz da demək olar ki, tamamilə sabit sürətlə baş verdiyindən normal vəziyyətlərdə hiss edilmir
